احمد جاوید… فرصت نہ ملی کارِ جہاں بانیِ دل سے

فرصت نہ ملی کارِ جہاں بانیِ دل سے
اترے نہ کبھی تختِ سلیمانیِ دل سے

کیا سرووسمن سیر کرے باغِ جہاں کے
حیراں ہے جو یک غنچہ گلستانی ِ دل سے

لوگو ابھی کچھ وقت ہے،چاہو تو بدل لو
دربانیِ دنیا کو نگہبانی ِ دل سے

ہے سنگِ تہِ آب ، ہمالہ ہو کہ جودی
زخَاری و موّاجی و طغیانیِ دل سے

ہاتھ آئے جو قسمت سے وہ گنجینۂ خوبی
چھٹ جائیں ہم اس بے سروسامانیِ دل سے

دنیا کی طرف دیکھ کے خوف آتا ہے مجھ کو
معموریِ آفاق ہے ویرانیِ دل سے

ظاہر میں تو سب جیب و گریباں ہے سلامت
ہے کام یہاں چاک بدامانیِ دل سے

پہناے دو عالم سے نکل جائیں گے ہم بھی
لگتا ہے یہ اندازِ پرافشانی ِ دل سے

ہر خارہوا بادیۂ غیب کا سیراب
جاوید اسی آبلہ سامانیِ دل سے

Related posts

Leave a Comment