افضل گوہر ۔۔۔ تمام بوجھ کہاں خاکداں پہ پڑتا ہے

تمام بوجھ کہاں خاکداں پہ پڑتا ہے
کبھی کبھی تو قدم آسماں پہ پڑتا ہے
یہ تیر یوں ہی نہیں دشمنوں تلک جاتے
بدن کا سارا کھچاؤ کماں پہ پڑتا ہے
تُو میرے سامنے آیا نہ کر عدو بن کر
کہ ہر نشانہ مرا اب نشاں پہ پڑتا ہے
تجھے زمین کے بارے میں علم ہے تو بتا
اِس آسمان کا سایہ کہاں پہ پڑتا ہے
اِدھر میں پاؤں اُٹھاتا ہوں اور اُدھر گوہر
غبار سا صفِ سیاّرگاں پہ پڑتا ہے

Related posts

Leave a Comment