جلیل عالی ۔۔۔ افق پار سے کوئی دیتا صدائیں تو ہم کب ٹھہرتے

افق پار سے کوئی دیتا صدائیں تو ہم کب ٹھہرتے
کبھی ساتھ لے کر نکلتیں ہوائیں تو ہم کب ٹھہرتے

گزاری ہیں کتنی ہی طوفان راتیں گھروں میں سمٹ کر
دمکتیں سرِ آسماں کہکشائیں تو ہم کب ٹھہرتے

یہاں آندھیوں نے کہاں کوئی پرواز کی راہ چھوڑی
ذرا بھی کہیں ساتھ دیتیں فضائیں تو ہم کب ٹھہرتے

بلایا کئی آشنا موسموں نے ملن ساحلوں پر
نہ دیوار بنتیں ہماری انائیں تو ہم کب ٹھہرتے

زمانے کی برفاب رُت سے کہاں کشتیِ شوق رکتی
اترتیں نہ اپنے لہو میں خزائیں تو ہم کب ٹھہرتے

یہ دنیا خجل خواہشوں کے گھنے جنگلوں میں پھراتی
نہ زنجیر کرتیں اگر کچھ وفائیں تو ہم کب ٹھہرتے

Related posts

Leave a Comment