شاہد ماکلی ۔۔۔ مجھ میں ہے آرزو کی لَو، تازہ بہ تازہ نَو بہ نَو

(حافظ شیرازی کے لیے)
مجھ میں ہے آرزو کی لَو، تازہ بہ تازہ نَو بہ نَو
روز فزوں ہے جس کی ضَو، تازہ بہ تازہ نَو بہ نَو

آخرِ شب یہ کس کی یاد مجھ میں سحر نشاں ہوئی

پھوٹ رہی ہے ایک پَو، تازہ بہ تازہ نَو بہ نَو

گزری رُتوں کا ہجر تو یاد بھی اب نہیں مجھے

مہکی ہے فصلِ وصلِ نو، تازہ بہ تازہ نَو بہ نَو

ایک اُمید کی کرن آئی تو ہے نظر مجھے

اُتری تو ہے فلک سے ضَو، تازہ بہ تازہ نَو بہ نَو

صبحِ ازل گزر گئی، شامِ ابد قریب ہے

آج بھی وقت کی ہے رَو ، تازہ بہ تازہ نَو بہ نَو

Related posts

Leave a Comment