اُداسی کا سماں ہے ، تُو کہاں ہے
بہر جانب خزاں ہے ، تُو کہاں ہے
مکیں ہے تُو مرے دل میں ، ولیکن
نگاہوں سے نہاں ہے، تو کہاں ہے
جہاں بھی ہے مجھے آواز دے دے
یہاں ہے یا وہاں ہے ، توُ کہاں ہے
بچھڑ کر بھی ، ابھی تک نام تیرا
مرے وردِ زباں ہے ، تُو کہاں ہے
جہانِ قلب میں مدت سے پیارے
بپا ، آہ و فغاں ہے ، توُ کہاں ہے
زمانے سے نہیں کوئی گلہ بھی
زمانہ مہرباں ہے ، تُو کہاں ہے
صدائیں دے رہا ہے تجھ کو ، شوکت
بتا دے توُ کہاں ہے ، تُو کہاں ہے
۔۔۔۔۔۔۔
چہرئہ گُل ، شگفتہ تر سا لگا
دشتِ ویراں بھی ، اپنے گھر سا لگا
شہر بھر میں سبھی فرشتے ہیں
شہر بھر سے عجیب ڈر سا لگا
اب کے ، قحط الرجال ہے ایسا
بے ہنر بھی تو با ہنر سا لگا
تیر ، باتوں کے دل پہ لگتے رہے
لہجۂ یار ، تلخ تر سا لگا
ایک صورت پہ مر مٹے ہم بھی
ایک پتھر ، ہمیں گہر سا لگا
عارضی ہے یہ رونقِ ہستی
حسنِ عالم بھی مختصر سا لگا
صورتِ قیس ، آج شوکت بھی
اپنی حالت سے بے خبر سا لگا