محمد شفیق انصاری ۔۔۔ موسمِ گُل عجب گُل کھلانے لگا

موسمِ گُل عجب گُل کھلانے لگا
میرا محبوب چہرہ چُھپانے لگا

قربتیں خواب ہوکر سبھی رہ گئیں
مِلنا جُلنا تو بالکل ٹھکانے لگا

ہم پہاڑوں سے خائف نہیں ہو سکے
ایک ننھا سا ذرّہ ڈرانے لگا

غیرمحتاط سارے رویّے گئے
ہر کوئی احتیاطیں بتانے لگا

قیدِ تنہائی جس کو دوا میں مِلی
وہ جبیں کو زمیں سے لگانے لگا

ہر معالج محافظ مسیحا بنا
کھیل کر جاں پہ جانیں بچانے لگا

شفیق امتحاں کے دنوں میں ہیں اب
ہم کو پروردگار آزمانے لگا

Related posts

Leave a Comment