آئی ہے زمانے کی ہَوا آس لگائے
پہلو میں لیے دل کا دِیا ، آس لگائے
جاتے ہیں تِرے در سے سبھی جھولیاں بھر کے
آتے ہیں تِرے در پہ سدا آس لگائے
ہم عاصیوں پر نظرِ کرم اے مِرے مولا
ہم بھی ہیں کھڑے روزِ جزا آس لگائے
تجھ سے جو بندھی ہے ہر ِاک احساس کی ڈوری
اِس دہر سے بندہ تِرا کیا آس لگائے
مانگے پہ تو دُنیا بھی ہمیں دے گی بہت کچھ
ہم تجھ سے ہیں کچھ اِس سے سوا آس لگائے
نظریں ہیں طوافِ حرمِ پاک میں مصروف
بیٹھی ہے جھروکے میں دعا آس لگائے