خاور اعجاز ۔۔۔ رباعیات

ماحول پہ اِک نشّہ سا چھا جائے گا
ہر جذبہ مرادوں کی گھڑی پائے گا
اِک لمس کی دولت مجھے مِل جائے گی
جب ہاتھ میں میرے تِرا ہاتھ آئے گا

۔۔۔۔۔۔۔۔۔۔۔۔۔۔۔۔۔۔۔۔۔۔۔

تقسیمِ محبت میں بھی کچھ غم ہی مِلے
پھِر بھی یہ شکایت کہ صلے کم ہی مِلے
اے زندگی اِک بات بتانا ہمیں سچ
کیا دِل کے دُکھانے کے لیے ہم ہی مِلے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ہے کون سی ایذا جو سرِ دار نہیں
لیکن یہ اذیت بھی ہمیں بار نہیں
اقرار نہیں جرم اگر ہے کچھ اور
ہاں جرمِ محبت ہے تو اِنکار نہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کچھ تُو بھی اکیلا رہا کچھ ہم تنہا
ہوتا رہا تنہائی کا ماتم تنہا
دے اذنِ رسائی کہ یہ کیفیت ہے
اُٹھتے نہیں کچھ روز سے اَب غم تنہا

Related posts

Leave a Comment