کُھل جائے گی ہر اک پہ حقیقت حضورؐ کی
محشر میں دیکھیے گا حکومت حضورؐ کی
زندہ ہے ، اور زندہ رہے گا اَبد تلک
جس دل میں بَس گئی ہے محبت حضورؐ کی
ایماں اُسی کا اکمل و کامل ہے صاحبو!
جس دل میں جاگزین ہے اُلفت حضورؐ کی
ہم جی رہے ہیں رحمتِ عالم کی چھاؤں میں
صَد مرحبا! سَروں پہ ہے رحمت حضورؐ کی
ربِّ غفور ! میری تہی دامنی نہ دیکھ
فردِ عمل میں لایا ہوں نسبت حضورؐ کی
جانِ انیس! حضرتِ حسانؓ ہوں جہاں
کیسے بیاں ہو آپ سے مدحت حضورؐ کی