گلِ خیال میں کرتی ہے پھر نمو تری نعت
مہک رہی ہے مرے دل میں چار سو تری نعت
کرم ہو مجھ پہ بھی حسّان کے سخی آقا
میں ایک بار پڑھوں تیرے روبرو تری نعت
سماعتوں سے اترتی ہے دل تلک خوشبو
کہیں سناتا ہے جب کوئی خوش گلو تری نعت
بھرے جہان میں سرمایہءسکوں ہے یہی
ترا خیال، ترے در کی آرزو، تری نعت
کہیں قصیدۂ بردہ شریف میں تری گونج
کہیں ہے مصرعۂ باہو میں ایک ہو تری نعت
بوقتِ صبح سناتے ہیں بعدِ حمدِ خدا
صبا، درخت، پرندے یہ آب جو تری نعت
سخن کے باب میں تیرا سخن ہے سب سے عظیم
جہان حرف میں ہے صنفِ آبرو تری نعت
فلک پہ جلوۂ انجم ہے تیرا لطفِ خیال
زمینِ شوق پر احساسِ رنگ و بو تری نعت
