مدح کی مشکلوں سے ڈرتے ہیں
لفظ اپنی حدوں سے ڈرتے ہیں
اے شہِ ثَورؐ ! تیرے دیوانے
کب جہاں کے ڈروں سے ڈرتے ہیں
حوصلہ بس حِرا سے ملتا ہے
جب بھی تنہائیوں سے ڈرتے ہیں
تیری دُھن میں سلجھتی جاتی ہیں
ہم کہ جن الجھنوں سے ڈرتے ہیں
اہلِ باطل کہ کج کلاہِ حرم
سب ترےؐ عاشقوں سے ڈرتے ہیں
کیسے کیسے شہانِ جاہ و جلال
تیرےؐ خستہ تنوں سے ڈرتے ہیں
معجزہ ہے کہ اب بھی، شب زادے
تیرےؐ روشن دنوں سے ڈرتے ہیں
ہم ترےؐ اور خدا کے پروانے
کہاں فرعونیوں سے ڈرتے ہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔