نعت
بہ لحنِ دیدۂ پرنم سخن تراش ہوا
حضورِ شاہ میں جس دم سخن تراش ہوا
ثنا کی راہ میں ‘‘لاترفعوا’’ تھا پیشِ نظر
اسی لیے تو میں مدھم سخن تراش ہوا
یہ احتیاط مجھے نعت نے سکھائی ہے
میں زود گو تھا مگر کم سخن تراش ہوا
بسایا دیدہ و جاں میں جمالِ شہرِ نبی
پھر اس کے بعد میں پیہم سخن تراش ہوا
فضائے طیبہ نے کھولے خیال کے روزن
نبی کے شہر کا موسم سخن تراش ہوا
جب ان کا ذکر کیا تو درود لب پہ رہا
وہ یاد آئے تو دم دم سخن تراش ہوا
کرم فروز تھی پچھلے پہر کی مشقِ سخن
سو میری آنکھ کا زم زم سخن تراش ہوا
کسی پہ ان کی حقیقت نہ کھل سکی سرور
یہاں تو ہر کوئی مبہم سخن تراش ہوا