اُم حبیبہ ۔۔۔۔ بوڑھے پیر کی کہانی (نثری نظم)

نويد صادق

بوڑھے پیر کی کہانی (نثری نظم)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تخیل کی اڑان میں
تصورات محوِ رقص ہیں
خاکی صحراوؤں کی گزر گاہیں
کتنی دلکش ہیں
کہ ان کے مبہم راستے
فریبِ امید ہیں جیسے
دور کسی خزاں کی بھینٹ چڑھتا
بے برگ پیڑ جس کی سرد چھاؤں میں
آس کی ضعیفہ جس کے بالوں میں
چاندنی اتر آئی ہے
کسی پرانی عمارت کی عکاس ہے
ہوا میں سانحے ہونے سے قبل
وہ اکلوتا چراغ جو ہم نے
بوسیدہ کمرے کی
شیلف پہ سجا کے رکھا ہے
اس کی لو کی آہٹوں میں
سلگتی شاموں کا دکھ پنہاں ہے
کہ اس گہرے گھپ اندھیرے میں
اب روشنی پڑنے سے دراڑیں پڑتی ہیں
جیسے وحشتوں کے قیام میں
خلل ڈال دیتی ہیں
یہ راہیں جو گمشدہ مسافروں کی
واحد گواہ ہیں
یہ شہرِ خموشاں کا سفر سمیٹ لیتی ہیں
باد صبا جس کی سماعتوں میں
خوشبوؤں کی سرگوشیاں ہورہی ہیں
اور وہ گونگے صدمے
بے حسی کے انگاروں پہ
جل رہے ہیں، بجھ رہے ہیں
وہم کی دیمک نے
مایوسیوں کا گھیرا تنگ کر دیا ہے
گویا آسمان کے خلاؤں میں
کہکشائیں ماند پڑ گئیں
یہ بادل کتنے بنجر ہیں
کہ ان میں اب بارشیں نہیں اگتی
سورج منتشر، آسمانی کنارے ویراں
کتنے پر کشش تھے میرے پیڑ
جن پہ آسیب زدہ سفید اندھیرا
نم تاریکیوں کا سحر طاری کیے ہوئے ہے
اور دور جھرنوں کے پہلو میں
چپ سادھے کوئل
وقت کے بوڑھے پیڑ کو
مفلوج ہوتی رونقوں کو
کوئی نئی منزل نہیں دکھا رہی
یہاں سرد مہری کے پہاڑ ہیں
وہ بیتی زندگی کا بین ہے گا رہی
یہاں ماتمی شور ہے، ہنگامہ ہے
یہ وقت کی تھکان کا آخری مرحلہ ہے
دریا پیاسے ہیں اب
ان میں آب حیات نہیں بہتا
اب امیدوں کی قندیلیں
ہوا کے سانحوں کی زد میںہیں

Related posts

Leave a Comment