بیادِ مجید امجد
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہوئے چمن میں مرے ترجماں گلاب کے پھول
لہو میں غرق، تبسم کناں گلاب کے پھول
میں اِن کے ساتھ خزاں میں بکھرتا جاتا ہوں
اڑا رہے ہیں مری دھجیاں گلاب کے پھول
جس انجمن میں کہ تھا کاغذی گلوں کا چلن
اُس انجمن میں جلے رایگاں گلاب کے پھول
ہمیں تو حسنِ نظر کا جنون ہے، ورنہ
کہاں یہ ریگِ رواں اور کہاں گلاب کے پھول
میں جانتا ہوں اِنھیں زخمِ تازہ کا فرمان
وہ بھیجتے ہیں مجھے ارغواں گلاب کے پھول
کوئی سنے تو خموشی ہے گفتگو اِن کی
کہ صد زباں بھی ہیں یہ بے زباں گلاب کے پھول
دعائیں کاوشِ امجد کو دیجیے خورشیدؔ
ہیں جس کے فیض سے نکہت فشاں گلاب کے پھول
ترے سخن میں رہے تا ابد گلوں کی مہک
’’تری لحد پہ کھلیں جاوداں گلاب کے پھول‘‘
