اکثر زبانِ حال سے کچھ بولتا بدن
منہ بند رکھ کے دل کی گرہ کھولتا بدن
انکار کر کے پاس بلاتی ہوئی نظر
میزانِ رخ پہ جنسِ ہوس تولتا بدن
آنکھوں سے لے کے روح کی گہرائیوں تلک
شیرینیاں نچوڑ کے رس گھولتا بدن
قرب و گریز کے سبھی اَسرار سر بسر
فیّاض ساعتوں میں مگر کھولتا بدن
محرومیوں پہ نوحہ کناں جوہرِ حیات
مٹی میں اپنے لعل و گہر رولتا بدن
فیضانؔ بن گلابِ انا الحق کا عندلیب
دار و رسن کی شاخ پہ رکھ ڈولتا بدن
