اِک سوچ آئی دل میں ترے انتظار کی
اور اپنے آپ بڑھ گئی رفتار کار کی
یہ ماجرا ہے شہر میں آوارگی کا دوست
سو بات اِس میں دشت کی آئے نہ خار کی
وہ کیمرے سے جھٹ مرے کمرے میں آگئی
اُس خوش بدن نے آج بہت دُور مار کی
دیکھے بغیر وصل کی منزل کو سر کیا !
جسموں نے اب صدا کی روِش اِختیار کی
اب تیز رابطوں کی بنیں صورتیں ہزار
صورت بچی نہ ایک ترے انتظار کی
عکس و صدا نے برق کی صورت سفر کیا
پل میں خبر ملی ہے سمندر کے پار کی ٭
سطریں سمجھ کے روز لکیریں پڑھا کیے
ہم نے تری ہتھیلی کہانی شمار کی
اپنی ہی موج موج سے پل پل مقابلہ
دریا نے ناؤ کتنی مصیبت سے پار کی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
٭ کس کو خبر ہے میرے سمندر کے پار کی
(میر تقی میر)
