جبینِ وقت پہ ابھرے اذیتوں کے نشاں
کہ رزقِ آتش و آہن ہیں فرحتوں کے نشاں
کہاں سے آگیا تیشہ ہوا کے ہاتھوں میں
شجر شجر کے بدن پر ہیں ضربتوں کے نشاں
مہکتی شام نے اوڑھا اداسیوں کا لباس
کہ چھا گئے ہیں ہر اک سمت ظلمتوں کے نشاں
حصارِ ذات سے باہر بھی آکہ بات بنے
کہیں کھنڈر نہ بنیں اپنی عظمتوں کے نشاں
عجب نہیں کہ ہوائوں کے رُخ پہ چل نکلیں
کہ ہم میں اب نہیں اگلی سی سیرتوں کے نشاں
کھلی فضائوں میں گھٹنے لگا ہے دم اپنا
کہاں سے ڈھونڈ کے لائیں فراغتوں کے نشاں
سکوں ملا نہ پرندوں کو آشیانوں میں!
کہ آندھیوں نے مٹائے ہیں راحتوں کے نشاں
دعا کے ساتھ دوا بھی تو چارہ گر بھیجے
وہ بے خبر کہ جو دیکھے نہ حسرتوں کے نشاں
ہمارے عہد میں آئے وہ زلزلے کہ حسن
رہے نہ سینۂ گیتی پہ پربتوں کے نشاں