اک لمحہء عرفان
۔۔۔۔۔۔۔۔۔۔۔
دوستو مجھ کو نہیں دعوئے پیغام بری
ہاں مگر کشف کے لمحات سے گُزری میں بھی
شب عجب سحر کے عالم میں مری آنکھ کھلی
کہ زباں پر تھی مرے موت کی سی بے مزگی
چادرِ سرد پہ اک نعش کی مانند تھی میں
اتنا بوجھل تھا لہو نبض بہت مدھم تھی
اس گھڑی سر میں نہ تھا دن کے خیالوں کا ہجوم
مری سانسوں میں مری ذات سمٹ آئی تھی
بعد از مرگ کے پیماں مرے دل میں گونجے
اور اس لمحہ میں ان سب کی ضرورت نہ رہی
میں کہ وہ نقش ہوں ہر لمحہ مٹاتا ہے جسے
میرا انجام فنا ہے تو چلو یوں ہی سہی
سرسراہٹ تھی فرشتوں کی نہ سرگوشئ غیب
چند سوکھے ہوئے پتوں پہ ہوا ہنستی تھی
میں بھی اوہام کے اصنامِ خیالی پہ ہنسی
اور اسی نیند کے سیال میں پھر ڈوب گئی
دل میں اس لمحۂ عرفان کی تائید لیے
دوسرے روز ملاقات کی امید لیے
۔۔۔۔۔۔۔۔۔۔۔۔۔۔۔۔۔۔۔۔
