کرم ، یا رسولؐ اللہ
……………….
کرم، یارسول اللہ! عطا، یارسولؐ اللہ!
اندھیروں میں ہوں میں نا سزا، یارسولؐ اللہ!
نظر،تن ،جگر ،دل، جاں مرض بڑھ گیا سب کا
دوا یارسولؐ اللہ! شفا، یارسولؐ اللہ!
ترے دیں کی عظمت کو تو مانے ہیں منکر بھی
مرا دیں ہے جو رسوا ہوا، یارسولؐ اللہ!
دل و جاں ہوئے طیبہ میں گم یہ بھی کھو جاتی
لیے پھر رہا ہوں جو اَنا، یارسولؐ اللہ!
فعولُن مفاعی لُن کے پابند تھے جذبے
میں شعروں میں کیا کرتا ثنا؟ یارسولؐ اللہ!
زہے’’طَلَعَ البَدرُ عَلَینا‘‘کہ طیبہ میں
ہے سرشار اب بھی مرحبا، یارسولؐ اللہ!
کُوئے’’مِن ثَنِیَّاتِ الوِدَاعٖ‘‘میں لے جائے
مرے آنسوئوں کو بھی صبا، یارسولؐ اللہ!
تھا جو’’وَجَبَ الشُّکرُ عَلَینا‘‘سے حق ہم پر
اُسے کھا گیا عہدِریا، یارسولؐ اللہ!
جو’’لَا تَرْفَعُوااَصوَاتَکُمْ‘‘ ہم سمجھ لیتے
نہ ہوتے جہاں میں بے نوا، یارسولؐ اللہ!
کسے پاسِ’’اُنْظُرْنَا‘‘ کہ خود آج امت کی
زبانِ عمل ہے’’رَاعِنَا‘‘، یارسولؐ اللہ!
کبھی وہ بھی دن آئیں کہ گونجے درودوں کی
مرے گنبدِجاں میں صدا، یارسولؐ اللہ!
دلِ زندگی کیا ہے سرِبندگی کیا ہے
اگر جاں نہیں تجھ پر فدا، یارسولؐ اللہ!
نثار آسماں کیا کیا ہوئے عشق کے تجھ پر
مرا علم ہے اب بھی خلا، یارسولؐ اللہ!
حمیدِ اَزَل کی ہے تجلی سے تُو احمد
تری حمد ہے لاانتہا، یارسولؐ اللہ!
جہاں سب کا وہ محمود ہے تُو محمد ہے
کہ ِاس حمد میں ہے خود خدا، یارسولؐ اللہ!
شبستانِ’’یَبْقٰی وَجْہُ رَبِّک‘‘فدا تجھ پر
ترے عشق ہی کو ہے بقا، یارسولؐ اللہ!
تو عشقِ اَبد ہے اور ترے آئینے میں ہی
وہ حسنِ اَزَل ہے خودنما، یارسولؐ اللہ!
یہی ناز ہے خود پر کہ میں تیراآصفؔ ہوں
شرف ہے مرامجھ سے بڑا یارسولؐ اللہ!
