انجم عثمان ۔۔۔ دو غزلیں

فقط ریگِ رواں تھی اور تنہا اک حُدی خواں تھا کہ میں تھی
تھا صحرا ، آگ برساتا ہوا سورج پس ِ جاں تھا کہ میں تھی

رواں تھی نیلگوںاِک گنگناتی جھیل سمتِ عشق لیکن
کہیں رستے میں سدِ راہ خود میرا نگہباں تھا کہ میں تھی

نہیں اترا تھا اب تک آبشاروں کی تہوں میں عکس میرا
مگر لہروں کے آئینے میں کل اک چاند جُنباں تھا کہ میں تھی

کہاں وہ بارگاہِ اہلِ غم کا سنگِ اسود اور کہاں میں
کہ بابِ خانقاہِ شوق پر اک سایہ رقصاں تھا کہ میں تھی
یہ قندیلیں سرِ طاقِ فلک جو جھلملاتی تھیں پسِ شب
سرِ مژگاں یہ ترسیلِ لہو سے نم چراغاں تھا کہ میں تھی

اماوس رُت نہ اُس کا غم اداسی اور نہ اُس کی منتظر آنکھ
کہ زیر و بم سے سانسوں کے تہی کنجِ شبستاں تھا کہ میں تھی

نہاں تھیں آسمانِ معرفت کی تہہ بہ تہہ پرتیں جو انجم
وہ بزمِ کشتگانِ عشق پر اترا دبستاں تھا کہ میں تھی

۔۔۔۔۔۔۔۔۔۔۔۔۔۔۔۔۔۔۔۔۔

خاکداں زد پہ ہے تغیّر کی ،خانہ انداز آسماں تاراج
موسموں کا مزاج برہم ہے،جا بجا فرشِ گلستاں تاراج

بحر خاموش ہے ،بھنور چپ ہیں ،کوئی طوفان بیقرار نہیں
لہر کس سمت سے اٹھی کہ ہوئیں دوشِ ساحل پہ کشتیاں تاراج

عکس روپوش ہیں ابھی کچھ دیر ،حیرتیں آئنوں سے باہر ہیں
اک جہاں عرصۂ شہود میں ہے ،اور ہوتا ہے اک جہاں تاراج !

ساعتیں ہو گئی ہیں زیرو زبر ،اک نیا ضابطہ نفاذ کو ہے
لحظہ لحظہ بکھر گئی تقویم ،لمحہ لمحہ ہوا زماں تاراج

اسم پڑھئیے کوئی اماں کے لیے ،کھینچئے اک حصار چھ اطراف
اک بلا ناگہاں مسلط ہے ،کر رہی ہے جو بستیاں تاراج

جب بھی انجم اسے تلاش کیا ، وہ تو شہ رگ سے بھی قریب ملا
تب یقیں جاگزیں ہوا دل میں ،خود بخود ہو گیا گماں تاراج

Related posts

Leave a Comment