چشمِ یقیں سے دیکھیے وہم و گماں آئینہ ہے
روشن ہے کوئی عکسِ گل ورنہ کہاں آئینہ ہے
دریا کی اتنی کج روی ساحل کی اتنی بے رخی
تم پر کوئی رنگِ ہوا اے بادباں آئینہ ہے؟
دیکھا ہے جس نے رات کا پردہ اٹھا کر دن کبھی
اُس پر یقیں آئینہ ہے، اُس پر گماں آئینہ ہے
سنتا ہے کوئی کب یہاں دریا کا شورِ خامشی
لیکن ہمارے دل پہ تو موجِ رواں آئینہ ہے
کس کا ہدف ہے میرا دل کس کا ہدف ہے میری جاں
مجھ کو خبر ہے تیر کی مجھ پر کماں آئینہ ہے
خیمے جلے ہیں کس طرح ،روزن بجھے ہیں کس طرح
تم پر چراغِ دوجہاں آگ اور دھواں آئینہ ہے
مہکا ہوا ہے کس قدر قریہ ہمارے خواب کا
شاخِ مکاں آئینہ ہے، باغِ زماں آئینہ ہے