آنے والوں کی خاطر ۔۔۔ یونس متین

آنے والوں کی خاطر

۔۔۔۔۔۔۔۔۔۔۔۔۔۔۔۔۔

سمندر کا پانی ۔۔۔
سمندر کا بہتا ہُوا نیلگوں سردپانی بلاتا ہے مجھ کو
سمندر۔۔۔
ازل جس کی لہروں میں رقصاں
سمندر۔۔۔
ابد گیر جس کے کنارے
سمندر کا پانی بلاتا ہے مجھ کو،
مَیں اک ریگ ِساحل کا رہرو
جومدفون شہروں کی تہہ سے نکالا گیا
سب پرانے زمانوں کے قِصّوں
نئے دَور کے قصہ خوانوں کے لب پر ہے میری ستائش
مَیں اِک ریگِ ساحل کا رہرو،
یہ بنجار نیں۔۔۔
یہ ہوائوں کی نو خیز صحرائی بنجارنیں
میری پیغام بر
میرے دمسازوغمخوار روشن ستارے
عدم کی متانت بھری بیکرانی
مِری جولانگاہ ِسخن ہے
وجودآشنا رات مجھ میں اُتر کر پکڑتی ہے مجھ کو
ابھی میرے سینے میں دل ہے

ابھی میری آنکھوں میں ہیں خواب زندہ
مجھے دیکھ کر رہزن ِمرگ
بے دست و پا ہو گیا
آنے والوں کی خاطر مِری ہر نظر کا ستارا
دعا ہو گیا
یہ سمندر،سماعت سے عا ری سمندر
مِرے بازئوں میں کہیں سو گیا
وقت کا جانشیں بن گیا اور امر ہو گیا

Related posts

Leave a Comment