مفرور
۔۔۔۔۔
کہیں تو ڈھونڈو سُراغ ان کا
کہاں ہے دل اور دماغ ان کا
ابھی تمہارے محاصروں میں گھرا ہے تاراج باغ ان کا
وہیں کسی راہ پر بچھی اُن کی چشمِ نم ہے
کٹا ہوا ہاتھ آج بھی بستۂ قلم ہے
گلوئے زیبِ رسن سے لپٹی ہیں ان کی بانہیں
جو گھر سے نکلے کہ جیسے دھرتی کے دل سے آہیں
جہاں تھے مسدود سارے رستے
وہیں پہ اُن کے قدم گڑے ہیں
تمہارے بوٹوں تلے وہیں ان کے دل پڑے ہیں
بس ایک دل تھا ، بس ایک جاں تھی
نہ اتنی یکتا
کہ تلملانے لگیں شکنجے
مزاجِ حاکم ہو اتنا برہم
مگر کوئی صیدِ نو رسیدہ، شکارِ تازہ
تمہارے چنگل کی زد سے باہر نکل گیا کیا؟
بلند سر بے کسوں کی حرمت
یہی تو تھی جسم و جاں کی قیمت
متاعِ انمول ہاتھ آئی
لپٹ کے دامن سے ساتھ آئی
وہی گھٹی آہ چیخ بن کر ضمیرِ عالم ٹٹولتی ہے
بہت نمک خوار مضطرب ہیں کہ برملا راز کھولتی ہے
یہ غیرتِ خاک ہے
کہ جو میرے نطق میں ڈھل کے بولتی ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔
