رونقِ جشنِ بہاراں میں خلل پڑتا ہے
تیرے بن صحن گلستاں میں خلل پڑتا ہے
تو مرے ساتھ اگر بات کرے ہنس ہنس کر
ساری ہی بزم رقیباں میں خلل پڑتا ہے
حجرہ وصل کی گر شمع بجھا دی جائے
اہلِ ہجراں کے شبستاں میں خلل پڑتا ہے
میری پوشاکِ دریدہ کی نہ کر بخیہ گری
یوں مرے چاک گریباں میں خلل پڑتا ہے
نغمۂ عیشِ طرب چھیڑ نہیں نغمہ گر!
گریۂ چشمِ غزالاں میں خلل پڑتا ہے
زمزمے ہجر کے جب تیری زباں سے سُن لوں
دل کے ہر سازِ پریشاں میں خلل پڑتا ہے
آ کے پہلو میں کسی شام نہ توُ بیٹھے اگر
سارے اعصابِ تن و جاں میں خلل پڑتا ہے
میری تصویر نمائش میں اگر رکھ دے تُو
نقشۂ بزم نگاراں میں خلل پڑتا ہے
