بانی ۔۔۔ اگر باقی کوئی رشتہ رہے گا

اگر باقی کوئی رشتہ رہے گا
ترے جی کو بھی کچھ دکھ سا رہے گا

چلو رسمِ وفا ہم بھی اُٹھا دیں
کوئی دن شہر میں چرچا رہے گا

نہ جائے گا کبھی دل سے ترا غم
یہ جوگی دشت میں بیٹھا رہے گا

ترے خستہ مزاجوں کو ہمیشہ
جنوں ترکِ محبّت کا رہے گا

یہ دشتِ دل ہے، کوئی آئے یا جائے
برابر ایک سنّاٹا رہے گا

ہوائے یاس کا ہلکا سا جھونکا
ترے آنے سے پہلے آ رہے گا

ہم اک دن خود سے غافل ہو رہیں گے
ترا غم دل ہی میں رکھّا                                 رہے گا

عدم کی سمت بڑھتا جائے گا دل
تجھے آواز بھی دیتا رہے گا

ابد تک ادھ کھلی آنکھوں میں تیری
کوئی جادو، کوئی دھوکا رہے گا

Related posts

Leave a Comment