ہَم نے کَب رَونقِ بازار سے حِصَّہ مانگا
دوسری سَمت نِکلنے کو ہے رَستہ مانگا
چَھاؤں مانگی ہے دَرختوں کی ، نہ باد و باراں
جَب بھی مانگا تِری دیوار کا سایہ مانگا
صحنِ دَربار میں گنبد سے پَرندے اُترے
بانجھ عورت نے جو روتے ہوئے بچہ مانگا
اِک قیامت تھی قیامَت کی گھڑی سے پہلے
ایک والد نے جو اولاد سے قَرضہ مانگا
روزِ تقسیم سبھی مانگ رہے تھے آنکھیں
میں نے پَہچان کی خاطر کو تھا چِہرہ مانگا
دِل تو کیا گھَر سے نِکلنے کو تِری یادوں نے
پیَر پَکڑے ہیں نِکلنے کو ہے رَستہ مانگا
غَم پُرانا ہو تو لَذّت ہی چَلی جاتی ہے
اِس لیے آپ سے اِک زَخم ہے تازہ مانگا
عُمر بَھر ساتھ نِبھانا ہو تو ،حَق بَنتا ہے
کیا بُری بات ہے اِس میں، تِرا شَجرہ مانگا
گَرچہ تَرکے میں تھا وَالد نے بہت کچھ چھوڑا
پھِر بھی بیٹی نے بہت شَوق سے میکہ مانگا
مُجھ کو دَانِش نے بَتایا کہ عِلاجِ غَم ہے
اِس لیے آپ سے بازو کا ہے تَکیہ مانگا
