حالتِ رنج میں کیا دھیان تمہارا کرتے
ہم اگر سانس بھی لیتے تو خسارا کرتے
جن کے سانسوں کی روانی ہی جڑی تھی تم سے
کس طرح یاد سے تیری وہ کنارہ کرتے
یوں اندھیروں کے تصرف میں نہ آتے ہم لوگ
تم اگر خاک کے ذروں کو ستارہ کرتے
چل پڑا ہوتا کسی آنکھ میں ٹھہرا دریا
آپ منظر کو اگر ایک اشارہ کرتے
تیری رسوائی کا گر خوف نہ ہوتا ہم کو
ہم ترا نام ہی ہر وقت پکارا کرتے
۔۔۔۔۔۔۔۔۔۔۔۔۔۔۔۔۔۔۔
مرا خیال کسی رنگ و رس میں آ جاتا ؟
جو اڑ رہا تھا پرندہ قفس میں آ جاتا ؟
ہر ایک چیز مرے اختیار میں ہوتی
اگر وہ شخص مری دسترس میں آ جاتا
تری زبان سے ہوتا اگر ادا ، سچ میں
جو پیار ، عشق ہے وہ بھی ہوس میں آ جاتا
ہمیں رکھا نہیں جاتا اگر ترے اندر
ترا وجود ہمارے نفس میں آ جاتا
مرے شریر سے دنیا نچوڑ دیتی اسے
سمن اگر وہ کسی ایک نس میں آ جاتا
