قریہ ساکنانِ گم گشتہ
ڈھونڈ اب خاکدانِ گم گشتہ
تو بھی ہو اب غبارِ راہ گزر
مل چکا کاروانِ گم گشتہ
آ ،فرامش گہِ وجود میں سن
بازگشتِ اذانِ گم گشتہ
فرس و تیغ و تیر و زین و زرہ
لٹ رہی ہے دکانِ گم گشتہ
کس ہدف کی طرف روانہ ہے؟
یہ خدنگِ کمانِ گم گشتہ
دیکھ کیا کیا سدھر گئے ہیں ہم
دیکھ اے بدگمانِ گم گشتہ! **
بس نکلنے کو ہوں تری جانب
اے مرے آسمان گم گشتہ!
(**اس شعر کی چال کہہ لیں یا تیور، اجمل سراج سے مستعار ہیں ۔ان کا شعر درج ذیل ہے
دیکھ کیا کیا اجڑ گئے ھیں ہم
دیکھ اے خوگرِ تماشا دیکھ)