مظفر حنفی ۔۔۔ ہاں بادِ صبا سچ ہے پریشاں رہے ہم

ہاں بادِ صبا سچ ہے پریشاں رہے ہم
غنچوں کے بہر حال نگہبان  رہے ہم

شبنم نے کیا پاک تو کانٹوں نے سیے چاک
ہر چند کہ مفلس کا گریبان رہے ہم

سر تا بہ قدم زخم ہے اب کیسے بتائیں
گلدان رہے ہم کہ نمکدان رہے ہم

واللہ کہ بچنے کے لیے سر نہ جھکایا
ناوک فگنی کے لیے آسان رہے ہم

بسمل تھے مگر رقص کیا، رنگ اڑائے
دنیا تِری تفریح کا سامان رہے ہم

یہ کیا کہ جدھر دیکھیے خود ہی سے لڑے آنکھ
اس آئنہ خانے میں تو حیران رہے ہم

تھے خاک بسر کِرمکِ شب تاب مظفر
ظلمت میں تری ذات کی پہچان رہے ہم

Related posts

Leave a Comment