یہی نہیں کہ فقط آئنے بدلنے لگا
وہ خال و خد بھی نئے سے نئے بدلنے لگا
ملا وہ مجھ سے کسی شام کا کنارہ لٸے
اور اِس کے بعد تو جیسے سَمے بدلنے لگا
اُسے لگا کہ اُسے لوگ دیکھتے ہیں بہت
وہ خوش جمال کٸی زاویے بدلنے لگا
میں سوچتا تھا ، اُسے ہم سفر بنا کے چلوں
وہ بات کرتے ہُوٸے راستے بدلنے لگا
ہوا ، دریچوں کو جس پَل حصار کرنے لگی
تو میں ستاروں سے اپنےدیے بدلنے لگا
اُسے خبر تھی کہ باہر سے میں بدلتا نہیں
سو میری ذات میں چُھپ کر مجھے بدلنے لگا
اُسی کی دُھن میں ہوں اطہر میں رقص کرتا ہوا
وہ زمزمہ جو مرے غم کی لے بدلنے لگا