جعفر بلوچ ۔۔۔ پیامِ  خیر و سلام

پیامِ  خیر و سلام
۔۔۔۔۔۔۔۔۔۔۔۔

میں خیر آئین ہوں جعفر
فقط دایاں نہیں ہوں میں
فقط بایاں نہیں ہوں میں

میں خیر آئین ہوں اور برسرِ پیکار ہوں شر سے
مرا  اِیماں ہے حسن و خیر کی قدریں ہیں آفاقی
ورا  ہیں سمت اور حد سے
مجھے تو میسروں اور میمنوں میں
خیر کی ترویج کرنی ہے
مری دائیں طرف اور بائیں جانب
پھول بھی ہیں اور کانٹے بھی
بہاریں بھی، خزائیں بھی
مگر میری تمنا ہے کہ ہر جانب
فقط رعنائیاں ہوں، نکہت و رنگ و ترنم ہو
سلام و خیر کا ہر سو  اُجالا ہو
فقط انسانیت کا بول بالا ہو
جہادِ زندگانی میں
وہ دائیں ہو کہ بائیں
میرے سب اعضا  ہی میرے کام آتے ہیں
اور اس حسنِ تعاون کی کرامت سے
ادھر بھی ان گنت اعزاز اور انعام آتے ہیں
سلام و خیر کا پیغام بر ہوں میں زمانے میں

یہی مقطع ہے میری سب نمازوں کا
جو میری دائیں جانب ہیں، سلام ان پر
جو میری بائیں جانب ہیں ، سلام ان پر
میں خیر آئین ہوں جعفر
فقط دایاں نہیں ہوں میں
فقط بایاں نہیں ہوں میں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

Related posts

Leave a Comment