تسخیر
۔۔۔۔۔
خلا کی تسخیر کرنے والو
سنا ہے تم چاند دیکھ آئے
کئی ارب ڈالروں کے بدلے
قمر کی مٹّی سمیٹ لائے
……..
خلا کی تسخیر کرنے والو
قمر کی تسخیر صد مبارک
جو خوابِ آدم کو تم نے بخشی
وہ زندہ تعبیر صدمبارک
……..
خلا کی تسخیر کرنے والو
یہ کارنامہ عظیم تر ہے
تمہاری ان کوششوں سے قائم
جلالتِ عظمتِ بشر ہے
……..
خلا کی تسخیر کرنے والو
بتاؤ کیا تم نے یہ بھی سوچا
تمہاری دنیا کا حال کیا ہے؟
زمیں پہ ہے ایک حشر برپا
…….
خلا کی تسخیر کرنے والو
کرو گے کیا مہ کی خلوتوں میں؟
ہزاروں انساں سسک رہے ہیں
تمہاری اپنی ریاستوں میں
……..
خلا کی تسخیر کرنے والو
دھواں زمیں سے نکل رہا ہے
دھماکے ایٹم کے ہو رہے ہیں
وجودِ انساں پگھل رہا ہے
……..
وہ دیکھئے قافلہ ہمارا
نجوم و مہ سے گزر رہا ہے
خلا کی تسخیر ہو رہی ہے
زمیں پہ انسان مر رہا ہے
……..
