بیت بازی – صفحہ 116

احمد کامران

عین ممکن ہے ترے ہجر سے مل جائے نجات کیا کریں یار یہ صحرا نہیں چھوڑا جاتا

اس لیے تیری کہانی سے ہوں باہر مجھ سے اک کردار بہتر آ گیا تھا

اب تو وہ لوگ بھی ملنے کو چلے آتے ہیں بات کرنے کو جو تیار نہیں ہوتے تھے

جس طرح آپ آئے سنا کر چلے گئے اتنا بھی مختصر مرا قصہ نہیں ہے دوست

ایک مدت سے خموشی کا ہے پہرہ ہر سو جانے کس اور گئے شور مچانے والے

بچ کر چلے ہیں راہ میں ہر نقشِ پا سے ہم آگے رہے ہیں چار قدم رہنما سے ہم

تھی خدا کی شرکت بھی ورنہ بوجھ نفرت کا کس طرح اٹھا پاتے شیخ و برہمن تنہا

کس طرح وہ دن بھلاؤں جس برے دن کا شریک ایک بھی اپنا نہیں تھا اور بے گانے کئی

زلفیں کھلیں تو سب نے کہا شام ہو گئی گزرا اِدھر سے کون گھٹا پوچھنے لگی

کٹتا بھلا کیوں کر شبِ فرقت کا اندھیرا پلکوں پہ چراغاں جو سرِ شام نہ ہوتا