سرفراز عارض ۔۔۔ سپاسِ بندگاں ابھی

سپاسِ بندگاں ابھی
ادا کرو میاں ابھی

گرا ہی چاہتا ہے کیا
سروں پہ آسماں ابھی

تَرَس نہ مجھ پہ کھائیے
خُلوصِ دوستاں ابھی

یہ اختیارِ جبر ہے
ـــکھڑا ہوں میں جہاں ابھی

جبینِ عجز پہ مرا
ہے داغ کا نشاں ابھی

پڑا رہے یہ نور سا
حجاب درمیاں ابھی

نہ ڈال اس پہ بارِ عشق
یہ دل ہے ناتواں ابھی

جھنجھوڑتا ہوں وقت کو
وہ بوڑھا میں جواں ابھی

میں سُن رہا ہوںاَن سُنی
سُنی سی داستاں ابھی

اُڑی ہیں اُن لبوں سے دو
وہ شوخ تِتلیاں ابھی

چُرا نہ آنکھ ساقیا
بھرا ہے دل کہاں ابھی

گُزر گئی ہے جان سے
براتِ عاشقاں ابھی

ہے عارضِ جمال پر
نگاہِ دلستاں ابھی

Related posts

Leave a Comment