کیسے دلِ بے تاب کا اظہار وہاں ہو
جس رشتۂ بے نام میں خاموشی زباں ہو
کس کو ترے پہلو میں غمِ سود و زیاں ہو
کیا کارِ محبت سے الگ کارِ جہاں ہو
ہر روز نئے خواب ہیں بہکانے کو اس کے
اے یادِ غمِ یار ،سرِ دل نگراں ہو
صدقہ تری رعنائی پہ ہو گردِ مہ و سال
ہر روز ترا حسن نئی دھج سے جواں ہو
اب صرف تصور سے گزارا نہیں ممکن
تم ہو تو مرے پاس مگر دوست کہاں ہو
میں تیرے تکلم کا مزا تجھ کو چکھاؤں
اے کاش مرے منہ میں اگر تیری زباں ہو
الفاظ میں معنی نہیں پہرے ہیں زباں پر
اے دل کی خلش اب مری آنکھوں سے رواں ہو
دستار سے ملتی نہیں جاذب یہ فضیلت
سردار ہے وہ سر جو سرِ نوکِ سناں ہو