میر تقی میر ۔۔۔ اب درد و غم سے عرصہ مرے جی پہ تنگ تھا

اب درد و غم سے عرصہ مرے جی پہ تنگ تھا
آیا شبِ‌ فراق تھی یا روزِ جنگ تھا

کثرت میں ‌درد و غم کی نہ نکلی کوئی تپش
کوچہ جگر کے زخم کا شاید کہ تنگ تھا

لایا مرے مزار پہ اس کو یہ جذبِ عشق
جس بے وفا کو نام سے بھی میرے ننگ تھا

دل سے مرے لگا نہ ترا دل ہزار حیف
یہ شیشہ ایک عمر سے مشتاقِ سنگ تھا

مت کر عجب جو میرؔ ترے غم میں مرگیا
جینے کا اس مریض کے کوئی بھی ڈھنگ تھا

Related posts

Leave a Comment