ابنِ آدم پر عیاں ہیں وقت کی جتنی جہات
ماسوا ان کے قسم کھاتا ہے پیرِ کائنات
* ساعتیں ہیں وقت سے آزاد جیون کا ڈرافٹ
آخرت پر کر رہا ہوں زندگی میں تجربات
وقتِ کی معلوم ہیئت کُن کا پیراڈاکس* ہے
آفرینش، حشر دونوں ایک جیسے حادثات
وقت کی معلوم ہیئت مہلتِ پروردگار
وقت کے اسرار سے ہے ماورا بھی کائنات
وقت جبرائیل کے ہاتھوں میں فیری ڈسٹ* ہے
وقت میکائیل کے ہاتھوں میں نم، شاخِ نبات
دستِ عزرائیل ہو یا صورِ اسرافیل ہو
وقت کی دنیاوی ہیئت سے دلاتا ہے نجات
وقت صوفی کا تبسم سائنسدانوں کی دھمال
وقت رقاصہ کی پائل میں تھرکتی کائنات
وقت سیگرٹ، پان، بیڑی، جام، تمباکو، سگار
رنگ، پیلٹ*، کینوس*، ایزل*، قلم، کاغذ، دوات
اپنی فطری ہیئتوں میں وقت پیراسائٹ* بھی
پالتا ہے زندگانی کے بدن میں واقعات
خواب مرشد درحقیقت ایبسٹریکشن* وقت کی
خواب کے اندر سمے کی ہیں علیحدہ نفسیات
عالمِ مادی میں واحدؔ گیم چینجر* ہے یہی
وقت کیا ہے؟ آفرینش، ارتقا و باقیات
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
Draft Paradox Fairy dust Palette Canvas
Easel Parasite Abstraction Game changer
