تپیدہ سینے میں داغِ سراغِ ہم نفساں ہے
کِھلا ہوا کوئی باغِ سراغِ ہم نفساں ہے
یہ کوئی اشک نہیں ہے جسے ستارہ کریں ہم
درِ نگہ پہ چراغِ سراغِ ہم نفساں ہے
سو ایک جرعۂ کم ہے ہم ایسے تشنہ لبوں کو
محیطِ خُم بھی ایاغِ سراغِ ہم نفساں ہے
سو چاہیے کہ ٹھٹھرتی ہوئی فضاؤں سے نکلے
اگر کسی کو فراغِ سراغِ ہم نفساں ہے
عجب نہیں کہ کہیں سرکشیدہ خاک سے پھوٹے
سفر گزیدہ جو راغِ سراغِ ہم نفساں ہے
عجب نہیں کہ کسی کاہِ زرد رنگ سے جھانکے
اگر کسی کو دماغِ سراغِ ہم نفساں ہے
کوئی صداے فغاں بھی شنیدنی ہے کہ سر پر
صدا بریدہ جو زاغِ سراغِ ہم نفساں ہے
بتائیے، کسے دکھلائیے کہ آج بھی خالد
تپیدہ سینے میں داغِ سراغِ ہم نفساں ہے
