اشتراک
۔۔۔۔۔۔
تجھے مبارک ترا عقیدہ
مجھے
مقدم مرا تفکر
چلو یہ مانا کہ خیر تو ہے
چلو یہ مانا
کہ میرا سارا
شعور
شر ہے
مرے سوالوں کا آج اتنا جواب دے دے
سن اے
مقدس صحیفے طاقوں میں رکھنے والے
کبھی پڑھا ہے؟
کہ ان صحیفوں میں کیا لکھا ہے
وہ معجزہ گر
سنی سنائی کہانیوں کے
تو جن کی قبروں کو سرخ پھولوں سے بھر رہا ہے
تو اُن گلابوں
کو زندہ لوگوں پہ خرچ کرتا تو کیا بُرا تھا؟
محبتوں کو
گناہ کہنے سے پہلے اتنا تو سوچ لیتا
کہ نفرتوں کے
ثواب میں آئی نفرتوں کو
سمیٹنے کا بھی
ظرف تجھ میں ہے یا نہیں ہے؟
عبادتوں کا
اگر طریقہ الگ الگ ہے
تو مشترک کیا
خدا کا ہونا بہت نہیں ہے؟
تجھے مبارک ترا عقیدہ
مجھے
مقدم مرا تفکر
۔۔۔۔۔۔۔۔
