پانچواں چراغ
……………..
سب کچھ میرے اندر اندر ہے
اندر ہی اندر
صوفیوں کے مقبرے، درویشوں کے رقص
شاہ حسین اور بلھے شاہ کی کافیاں
میاں محمد بخش کی درگاہ کا انجذاب
اور لال شہباز کے چار چراغ
میرا جھومتا ہوا وجود
صوفیوں کا پلایا ہوا نہ ٹوٹنے والا نشہ
میں اپنے اندر اندر چلتا ہوں
دھوپیں، بارشیں
پٹ جھڑ کی پیلی سہ پہریں
سرما اور سرما کی مہمان نواز پیلی دھوپیں
اور گرما میں
ٹھنڈے سایوں کے چھجے
سب کچھ میرے اندر ہے
بادل، دھوپیں، سائے اور بارشیں
پت جھڑ، پھول اور درگاہیں
اور اونچے پیڑوں پر بندھے دھاگے
یا میرا جھومتا ہوا وجود
شاہ حسین کی چوکھٹ
بلھے شاہ کا گنبد
اور لال شہباز کے چار چراغ
اور پانچواں میرے ہاتھ میں ہے
یہ سب کچھ میرے اندر ہے
اندر ہی اندر …….
” اندروں اندر وگدا جاندا پانی درد حیاتی دا "
۔۔۔۔۔۔۔۔۔۔۔۔۔۔۔۔۔۔۔۔۔۔۔
