جشنِ آزادی کی شب
۔۔۔۔۔۔۔۔۔۔۔۔۔۔۔۔۔۔۔
یہ کس بستی میں خود کو بیچنے نکلے ہو!
جس کے باسیوں کے ہاتھ کاندھوں تک کٹے ہیں
اور جیبوں میں سوائے پتھروں کے کچھ نہیں ہے
کون سی بستی کے لوگوں میں چلے آئے ہو،
جن کے لیکھ میں ماضی نہ آیندہ
فقط کشکول ہیں
جو حال کی گردِ ملامت سے اٹے ہیں
چند خوابوں کے عوض آنکھوں کو گروی رکھ چکے ہیں
اک اندھیری دھوپ کے لرزیدہ ہاتھوں میں،
یہاں امشب جلوسِ ناگہاں ہے
آج برفیلے اندھیرے کی رگوں میں ہانپتی بے
نُور لرزاں مشعلوں سے
جسم داغے جائیں گے
نانِ جویں کو سُولیوں پر رکھ کے سارے شہر کی
بھوکی مگر منہ زور
خلقت میں پھرایا جائے گا
بستی سے باہر
اک کھلے میدان میں
سورج کو نیزے میں پرو کر
گوشت کے بے کار ریشوں میں
توانائی انڈیلی جائے گی
یہ جشنِ آزادی کی شب ہے
جس کے ماتھے پر لہو کا ایک بھی چھینٹا نہیں!
حدِّ نظر تک۔۔۔۔
سوم کے دیوار و در سب جگمگا اُٹھّے ہیں!
نازک آئنہ جسموں کی جلتی مشعلوں سے
ہر نفس آزاد
پیمانے۔۔۔۔۔ لب و رُخسار بھی آزاد
میرے ہاتھ بھی آزاد۔۔۔۔!!
