شوکت محمود شوکت ۔۔۔ بحرِ بے کراں

بحرِ بے کراں
۔۔۔۔۔۔۔۔۔۔۔۔۔۔۔۔۔۔۔۔۔۔۔
عشق الہام ہے ، کرامت ہے
عشق اک مسندِ حقیقت ہے
عشق سوزِ درونِ دل کی دوا
عشق فردوس ، عشق جنت ہے

عشق بِن ہے جہان ، لق و دق
زندگی میں ہے عشق سے رونق

عشق دنیا میں گر نہیں ہوتا
رنگِ عالم نہ یوں حسیں ہوتا
جھگڑے ہوتے نہ زن ، زمیں ، زر کے
عشق دل میں اگر مکیں ہوتا

عشق کرتا ہے رام ، پتھر دل
عشق آساں کرے ہے ہر مشکل

زندگانی ، فضول ہے بِن عشق
یہ جوانی ، فضول ہے بِن عشق
جاودانی ہیں عشق کے قصّے
ہر کہانی فضول ہے بِن عشق

عشق مجنوں ہے ، عشق لیلیٰ ہے
عشق ہی نور ہے ، سویرا ہے
عشق ہادی ہے ، عشق رہبر ہے
اس کا چرچا ، جہاں میں گھر گھر ہے
سچ کہوں تو جہان میں اس کی
ذات اعلیٰ ہے ، ذات برتر ہے

عشق ہی کائنات کا تحفہ
عشق ہی شش جہات کا تحفہ

عقل والے کہیں کہ کیا ہے عشق؟
مرضِ عشق کی دوا ہے عشق
میر ، کیا خوب کہہ گیا شوکت
’’سارے عالم میں بھر رہا ہے عشق‘‘

اندروں ، سینۂ تپاں ہے ، عشق
الغرض ! بحرِ بے کراں ہے عشق

Related posts

Leave a Comment