کوئی صفحہ کوئی چہرہ
۔۔۔۔۔۔۔۔۔۔۔۔۔۔۔
ہمارے خواب لوٹا دو
کہ اب عمرِ گذشتہ کی ہر اک کھڑکی سے
رہ رہ کر کوئی چہرہ ابھرتا ہے
ہر اک لمحہ بکھرتا ہے
کسی ویران کمرے میں کوئی طوفان اٹھتا ہے
یہی آواز آتی ہے
"ہمارے خواب لوٹا دو"
ہمارے بے کراں خوابوں میں
صدیوں کی رفاقت ہے
کسی کی گل فشاں رنگیں شباہت ہے
ہمارے روز و شب کی سرمئی صدیوں پہ کاتب نے
کوئی تحریر لکھ دی ہے
شبِ تنویر لکھ دی ہے
یہ کیسے رنگ بکھرے ہیں
فضا میں کیسی جھلمل ہے
یہ کیسے سرخ ڈورے ہیں
رگوں میں کیسی ہلچل ہے
ہمیں احساس ہوتا ہے
کہ اب عمرِ گذشتہ کی
ہر اک کھڑکی سے رہ رہ کر
ہزاروں آشنا چہرے
اشارے کرتے رہتے ہیں
نئے منظر دکھاتے ہیں
نئے رستے سجاتے ہیں
ہزاروں دیپ جلتے ہیں
ہزاروں دیپ بجھتے ہیں
چلو عمرِ گذشتہ کا کوئی صفحہ چرا لائیں
پسِ پردہ
کسی بھولی ہوئی کھڑکی پہ لہرائیں
۔۔۔۔۔۔۔۔۔۔۔۔۔۔۔۔۔۔۔۔۔
