نعت رسول پاک صلی اللہ علیہ وسلم ۔۔۔ صہیب اکرام

تھا سفر کٹھن، سو ترے سوا کوئی رہنما نہ مرا ہوا
مرے دشتِ جاں میں قدم قدم، ترا نقشِ پا ہے سجا ہوا

یوں تو لاکھ رنگ ہیں درد کے، جو کہ چار سو ہیں کِھلے ہوئے
وہ کسک، وہ سوز کہاں کہ جو ترے غمزدوں کو عطا ہوا

تری جلوتوں کے جلال میں، تری خلوتوں کے جمال میں
جو بھی عکس تیری ادا کا تھا وہ تھا آبِ زر میں ڈھلا ہوا

مجھے صرف تیرے ہی معجزوں کے طفیل تابِ سخن ملی
میں وگرنہ دشتِ گماں میں تھا کہیں مثلِ خار پڑا ہوا

سرِ جلوہ گاہِ جمال سب مرے درجہ وار رقیب تھے
کہیں یہ زمین بچھی ہوئی، کہیں آسماں تھا جھکا ہوا

سرِبزم ذکر ترا چِھڑا، کہیں کوئی تارِ نفس ہلا
کہ ترے عدد سے عدد ملا تو درِ یقین بھی وا ہوا

یہ صہیبِ بسملِ آرزو، وہاں روزِ حشر ہو روبرو
تو رہِ خیال میں چار سو، ہو ترا ہی اسم کھلا ہوا

Related posts

Leave a Comment