تِرے ذکر سے لمحہ لمحہ فروزاں
تِرے نور سے ساری دُنیا فروزاں
تِرے حکم سے جب نکلتا ہے سورج
تو ہوتے ہیں سب باغ و صحرا فروزاں
تخیّل تِرا جلوہ گر جب ہُوا ہے
شبِ تِیرہ کو ہم نے دیکھا فروزاں
مِرے خانۂ قلب کا ذرّہ ذرّہ
کِیا تو نے ہی میرے مولا فروزاں
درخشاں تِرے نور سے کہکشائیں
ہے خورشید میں تیرا جلوہ فروزاں
فقط اپنی قدرت سے اے میرے مولا!
یہ عالم کیا تو نے سارا فروزاں
ندیمؔ اب دُعا اور کیا تجھ سے مانگے
ہُنر مَیں نے مِدحت کا پایا فروزاں