رنگِ حنا پہ رنگِ خزانی نہیں چڑھا
دریا اُتر گیا ہے کہ پانی نہیں چڑھا
کٹتے ہیں بے کنار اندھیرے میں رات دن
دیوار پر چراغِ زمانی نہیں چڑھا
سویا رہا ہوں کتنے زمانوں تلک کہ میں
بوڑھا تو ہو گیا ہوں،جوانی نہیں چڑھا
آنکھوں میں سرفراز ہے اک آئنہ بدن
دل پر جمالِ پرتوِ ثانی نہیں چڑھا
لکنت زدہ تھی نُطق کی تعبیر اس لیے
سر کو خُمارِ شعلہ فشانی نہیں چڑھا
تفہیم اس کنایۂ ہستی کی قرض ہے
دریائے صبحِ حرفِ معانی نہیں چڑھا
لایا ہے میرا عشق مجھے اس مقام پر
میں بھی بزورِ شیریں بیانی نہیں چڑھا
ساجد زوالِ آدمِ خاکی نظر میں رکھ
چِلّے میں کوئی یاد پُرانی نہیں چڑھا
