احمد جلیل ۔۔۔ حسرت سے ہم بہ دیدِۂ نم دیکھتے رہے

حسرت سے ہم بہ دیدِۂ نم دیکھتے رہے
روکے نہ اس نے بڑھتے قدم دیکھتے رہے

لفظوں میں حُسنِ یار سمیٹوں تو کس طرح
حیرت سے مجھ کو لوح و قلم دیکھتے رہے

میرے علاوہ سب کی طرف دیکھتا تھا وہ
محفل میں شوق سے جسے ہم دیکھتے رہے

یہ اور بات خود نظر آئے نہ وہ کہیں
ہوتے رہے جو ان کے کرم دیکھتے رہے

ٹوٹے ہیں آج پر، تو گرے ہیں زمین پر
اب تک بلندیوں کو ہی ہم دیکھتے رہے

کرب و بلا میں شامِ غریباں کی اوٹ سے
نیزے پہ جو سجا تھا علم دیکھتے رہے

بکھری ہیں دور دور یہ خوابوں کی کرچیاں
اک ایک کرکے ٹوٹے بھرم دیکھتے رہے

جوں جوں نیاز مندیاں میری بڑھیں جلیل
بنتے گئے خدا وہ صنم دیکھتے رہے

Related posts

Leave a Comment