سینے کی تہ میں دل سے اچانک دھواں اُٹھا
پہلو سے میرے جب وہ مرا مہرباں اُٹھا
واجب ہوئی ہیں آنکھ پہ تب اشک باریاں
جس روز بزمِ دل سے کوئی ہم زباں اُٹھا
دیکھی گئیں نہ اُس سے نئی نِت صراحیاں
چپ چاپ مے کدے سے وہ پیرِ مغاں اُٹھا
باہر تو خیریت ہے، بس اندر ہے ابتری
دیکھا نہ وہ کسی نے، جو سوزِ نہاں اُٹھا
ہوتا نہیں کسی پہ بھی واعظ کا کچھ اثر
جاتی رہی مٹھاس تو لطفِ بیاں اُٹھا
سب دیکھتے رہے ہیں، سہارا نہیں دیا
کاندھوں پہ اپنا بوجھ لیے ناتواں اُٹھا
شعر و سخن تمام ہوا آفتاب پر
اب تُو بھی کوئی رنگ مرے آسماں اُٹھا