فراق و وصل ہی کے تذکروں میں زندگی گزری
ترے حسنِ نظر کے دائروں میں زندگی گزری
نہ جانے کیا کہا اظہارِ الفت پر ستم گر نے
برستے آنسوئوں کے ساونوں میں زندگی گزری
مرے مجموعہِ افکار میں عکسِ طرب کیسا؟
مری تو لمحہ لمحہ سانحوں میں زندگی گزری
گلہ شکوہ کروں کیا بحرِ غم کی بیکرانی کا
تری موجِ تبسم کی حدوں میں زندگی گزری
نظر آئے نہیں چشمِ انا کو روز و شب اپنے
ہمیشہ دوسروں پر تبصروں میں زندگی گزری
بھلا اچھے بُرے کا فیصلہ ہم کر سکیں کیسے؟
بزرگوں کے بتائے راستوں میں زندگی گزری
نکل کر جسم کی حد سے کبھی دیکھوں اُڑان اپنی
انھی بے نام خودسر حسرتوں میں زندگی گزری
نمو پاتی بھلا کیسے مری شاخِ طلب فرحان
کسی بے رحم پت جھڑ کے سموں میں زندگی گزری