تماشا لگا ہے دلالت کیے جا
سیاست ، حراست ، وکالت کیے جا
پتہ ہے تجھے کچھ مرے حالِ دل کا
تو ہجراں میں یارا طوالت کیے جا
یہ گھاؤ ترے ہیں جگر بھی ترا ہے
بڑے شوق سے تو کفالت کیے جا
یہ دستِ طلب جب ترے ہاتھ میں ہے
تو چاہے جہاں تک ذلالت کیے جا
ستا تو، جلا تو، جلا کر ستا تو
ستم گر! ستم میں جہالت کیے جا
تری زندگانی کا مقصد یہی ہے
محبت محبت محبت کیے جا
بتوں سے سروکار کیا تجھ کو طاہر
تو چہرے کی اس کے تلاوت کیے جا
